تحليل تقرير البنك الدولي بشأن الوضعية الاقتصادية بالجزائر

 و كيف العادة، هاد الفيديو خذا ليا بزاف ديال الوقت من حيث دراسة التقرير ديال البنك الدولي و كتابة السكريبت  حتى المونتاج، اقل حاجة ممكن تدعمونا بيها هي الاشتراك عندي فالقناة، شكرا للدعم ديالكم، يالله نبداو على بركة الله.

• بل ان الأدهى من ذلك هو ان البنك العالمي قد أشار الى "الفقر في الجزائر" في الوقت الذي تغاضى فيه عن وضعية الهشاشة المأساوية وحتى الخطيرة والمدمرة السائدة في بلد مجاور من الجهة الغربية، يقصد المملكة المغربية ؛

• ولا غاية ترجى من هذا المسعى سوى تشويه صورة الجزائر و ادخال الشك في نفوس الجزائريين لا سيما بعد صور الوحدة والتآخي التي شهدها الوطن مؤخرا عقب تتويج المنتخب الوطني لكرة القدم بكأس العرب للفيفا.

كانت هذه اخواني مقتطفات من داكشي لي تكتب فالصحافة الجزائرية و بالبضبط فوكالة الانباء الجزائرية APS بشأن تقرير البنك الدولي لي تصدر مؤخرا بشأن الوضعية الاقتصادية في دولة الجزائر.

فهاد الحلقة غادي ندوي ليكم على النقط لي جات فهاد التقرير لي تصدر نهار 22 دجنبر 2021 و لي كتبات عليه الصحافة الجزائرية بزاف بل انها هاجمات البنك الدولي و وصفاتو بأنه مؤسسة صهيونية  بأنه كيهاجم الجزائر برعونة.

قبل ما نبدا غادي نعطي واحد الفرق جوهري مهم من خلالو غادي نفرقو بين البنك الدولي و بين صندوق النقد الدولي لأن هاد المؤسسات بجوجهم دارو تقارير على الجزائر، ديال صندوق النقد الدولي خرج فشهر 7 و ديال البنك الدولي خرج كيما قلت فالأواخر ديال شهر دجنبر لكن لي تعطات اهمية كبيرة للتقرير ديال البنك كثر من ديال الصندوق. الفرق هو ان البنك الدولي كتعطي اهمية بزاف للمسائل ديال التنمية البشرية le développement humain داكشي علاش كتلقاه كيدوي و كيفصل فظاهرة الفقر و انواعها. في حين ان الصندوق كيعطي اهمية للمسائل النقدية و نظام الصرف و سياسة الميزانية. هذا هو الفرق الجوهري. علاش كتعطى اهمية للتقرير ديال البنك الدولي و كيتم التجاهل ديال التقارير ديال صندوق النقد الدولي ؟ لأنه بكل بساطة باش تفهم اللغة ديال FMI خاصك تكون متخصص فالاقتصاد و كتفهم فالمسائل النقدية بخلاف التقرير ديال البنك الدولي.

ندوزو بعجالة للنقط لي هضر عليهم البنك الدولي فالتقرير ديالو.

التقرير قال بلي الدينار الجزائري واصل الهبوط ديالو مقابل الدولار الامريكي، و التقرير ستعمل كلمة dépréciation و ماشي Dévaluation و الفرق بيناتهم ان اللولى اي depreciation كتعني هبوط غير متحكم فيه يعني ان القيمة ديال العملة كتهبط بوحدها بلا ميتدخل البنك المركزي باش يهبطها بالسياسات المعروفة فالاقتصاد النقدي. الظاهرة الاخرى هي العكس يعني ان الهبوط ناتج على فعل فاعل لي هو البنك المركزي. المهم ان التقرير ستعمل كلمة dépréciation لي كتعني بلي القيمة ديال الدينار كتفقد بوحدها امام الدولار و هنا خاصنا نعرفوا السبب. اشكايعني هاد الهبوط ؟ كيعني بلي العرض ديال الدينار فالسوق الجزائرية اكبر من العرض ديال الدولار، يعني الدينار موجود غير مدفق نسبيا. علاش ؟

انطلاقا من البحت لي درنا لقينا بلي للامر كيتعلق بهبوط متحكم فيه يعني ان السلطات النقذية الجزائرية كتدير سياسات نقدية باش تهبط من القيمة ديال الدينار مقابل الدولار و الغاية هي انها تضخم القيمة ديال الصادرات ديالها و تلقا باش تخلص ديك 3 د لملاين ديال الموظفين ديالها و تمول قطار الحياة ديالها. علاش، لأن اغلب المداخيل ديال الدولة الجزائرية جاية من التصدير ديال المحرقات.

نعطيكم مثال :

الى كان مثلا واحد دولار امريكي كيساوي 140 دينار جزائري و الى فتارضنا بلي القيمة ديال الصادرات هي 100 مليار دولار ف الى حولناها للدينار غادي تكون عندنا 140 مضروبة ف 100 مليار كيعطينا 14000 مليار دينار ؛

و لكن مع هاد الهبوط الى قلنا بلي هاد الدولار الامريكي ولى كيساوي 150 دينار ف القيمة ديال الصادرات ديال قبيلة غادي تولي 15000 مليار دينار اي بزيادة 1000 مليار دينار شتو الفرق، هادشي مزيان للدولة فالأمد القصير و لكن غتجر عليها بزاف د المشاكل مع المدة لأن القيمة الحقيقية ديال الدينار غادية و كتناقص و المواطن الموظف مثلا كيشد نفس الاجر سواء قبل او بعد الهبوط ديال القيمة و لكن هادشي كيبان فالتضخم و الارتفاع الفاحش فالأثمنة ديال المنتوجات.

البنك الدولي هضر ايضا على الدين العمومي الجزائري لي وصل للسقف. الجزائر فعلا معندهاش ديون خارجية و التمويل ديال الدولة معتامد على التمويل الداخلي لي كتوفرو البنك المركزي هاد البنك كتعطي للدولة اي وزارة المالية لفلوس و كتشد عندها سندات الخزينة. هاد النقطة دوا عليها حتى صندوق النقد الدولي و قال عليها بأنها كتشكل خطورة على الاقتصاد. كيفاش كيديرو ليها ؟ 

كتجي وزارة المالية كتشد لفلوس ليكيد عند الابناك و كتعطيهم سندات الخزينة. كيجي البنك المركزي و كيشد عندهم هاد السندات و كيعطيهم فلوس ليكيد. داكشي ضاير بيناتهم و البنك المركزي كيمول الدولة ممثلة فوزارة المالية بطريقة غير مباشرة. هاد النوع ديال التمويل كيشكل خطر على الاقتصاد و بسباب هاد التمويل فالدين العمومي طلع بشي 12.9 فالمائة ف سبع د الشهور.

البنك الدولي هضر ليهم على ديك القضية لي كتدير الدولة الجزائرية و لي كتمثل فالشراء ديالها للديون ديال الابناك و الشركات العمومية. هاد القاضية مقبولة الى كانت مرة فشحال او الى وقعات شي ازمة بحال فالولايات المتحدة الامريكية ف 2008، و لكن فالجزائر البنك المركزي كيتدخل مرة مرة و بصفة دورية يعني متواترة او كتعاود حتى ولات الشركات ديال الدولة و الابناك ديالها متقدرش تعيش بلا المساعدات المالية ديال البنك المركزي الجزائري. الشركات العمومية الجزائرية و حتى الابناك ديالهم كنشبهها بشي دري ضاصر، كيبقى يخربق من هنا و لهيه و يكريدي من هنا و لهيه و فالآخر كيجي باه مول الشكارة كيخلص كولشي. هاد الشكارة بالنسبة للجزائر هي فلوس الغاز و البترول لي كتوصل حتى ل 95 فالمية من المداخيل ديال هاد الدولة.

البنك الدولي دوا كذلك على الإنتاج الفلاحي المخيب للآمال و حتى الخفض ديال القيمة ديال الدينار و التأثير ديالو على نسبة التضخم لي طلعات حتى ل 9.2 فالمائة فأكتوبر 2021. هاد التضخم غادي و كيتزاد، علاش ؟ لأن الجزائر كتعيش جوج الظواهر لي هما التراجع ديال القيمة ديال الدينار الجزائري و فنفس الوقت دايرة واحد الحصار على الاستيراد. هاد الحصار غادي يخلي المنتوجات قليلة فالسوق و بالتالي غادي يطلع الثمن ديالها. الجزائر دارت حصار على الاستيراد و لكن ما وجداتش الانتاج الوطني ديالها و لي خاصو يساير او يوفر هاد المنتوجات الاجنبية.

المسألة ديال التطعيم لي ناقص المستوى ديالو فالجزائر غادي يشكل عبئ كبير على القطاعات الاقتصادية خارج المحروقات. هاد القطاعات تأثرات بزاف بسبب الاجراءات لي تدارت بسباب انتشار فيروس الكوفيد لأن الدولة ما دارتش شي برنامج بنيوي و سريع باش تنقد بيه هاد القطاعات، لذلك فالاقتصاد مغاديش ترجع ليه العافية ديالو الا بعد مدة. و لكن، و هنا كيسطر عاوتاني الخصوصية الجزائرية، فإن الاستهلاك ديال القطاع العام هو لي غادي يهز بالاقتصاد.

الاحتياطات ديال الصرف او ما يسمى réserves de change غادي يتزادو هاد العام و لكن غادي تعاود تهبط لأن البنك الدولي كيتوقع ان الاثمنة ديال المحروقات غادي تعاود تهبط، و هنا غادي نشير لواحد القاضية ان الجزائر كان عندها ف 2012 واحد الكمية كبيرة جدا ديال احتياطات الصرف وصلات ل 200 مليار دولار و لكن للأسف الشديد ما دارتش بيهم شي حاجة ترجع بالنفع على البلاد كيما دارو دول الخليج و خاصة قطر و الامارات. البنك الدولي كيشوف بلي المداخيل ديال البترول غادي تراجع و بالتالي غادي تأثر بشكل كبير على العجز ديال الميزانية.

الاقتصاد الجزائري غادي فالخسران ما دام ان الحكومة مادارتش شي اجراءات بنيوية لي غادي تغير البنية ديال هاد الاقتصاد لي مبني كولو على الدولة او القطاع العام و المحروقات. الدولة كتخلص اموال هائلة باش تحافظ على السلم الاجتماعي و كتخلص اموال هائلة كذلك باش تشري الديون ديال الشركات العمومية.

و لكن الحاجة لي معجباتش المسؤولين الجزائريين هو المسألة ديال الفقر. هاد المسألة هبلاتهم و خرجات ليهم العقل بل انهم مشاو عاوتاني كيجبدوا المغرب و بلي هما احسن و افضل منو باشواط، و الى بغيتي تعرف الحجم ديال هاد الهبال نعطيك مقتطف من المقال لي تنشر فوكالة الأنباء الجزائرية : 

• بل ان الأدهى من ذلك هو ان البنك العالمي قد أشار الى "الفقر في الجزائر" في الوقت الذي تغاضى فيه عن وضعية الهشاشة المأساوية وحتى الخطيرة والمدمرة السائدة في بلد مجاور من الجهة الغربية.

• ولا غاية ترجى من هذا المسعى سوى تشويه صورة الجزائر و ادخال الشك في نفوس الجزائريين لا سيما بعد صور الوحدة والتآخي التي شهدها الوطن مؤخرا عقب تتويج المنتخب الوطني لكرة القدم بكأس العرب للفيفا.

• و لكن اشقال البنك الدولي على الفقر فالجزائر ؟

• البنك كيقوليك بلي الجزائر حققات بين 2013 و 2019 تحسن مهم في محاربة الفقر مقارنة مع دول اخرى فمنطقة الشرق الاوسط و شمال افريقيا او دول MENA. و لكن كاين واحد النوع ديال الفقر كيتسمى ب la pauvreté multidimensionnelle او الفقر المتعدد الأبعاد مختالف بزاف بين المناطق ديال الجزائر، مختالف بين المناطق الحضرية و القروية، و بين حتى الجهات. فالسكان لي عايشين فالوسط او الشرق ديال الشمال ما محرومينش بزاف اكثر من السكان فالمناطق لخرين. و الفقر فالهضاب العليا الوسطى اشد حرمانا.

• و لكن اشناهو هاد الفقر متعدد  الابعاد ؟

• هو الفقر معندوش علاثة بشحال دلفلوس كيشدو الافراد لي معنيين و انما كيتقاس بالوضعية ديال ثلاثة ديال العناصر لي هي :

• الصحة و التمدرس و شروط العيش، كيف كيبين هاد المبيان، هاد ثلاثة دالعوامل كتدمج وفق واحد المعادلة معينة باش يعطيونا واحد المعدل لي كيتسمى ب Indice de la pauvreté multidimentionnelle او مؤشر الفقر متعدد الابعاد 

• عامل الصحة كيتعلق بالتغدية و الوفاة ديال الاطفال اقل من 5 سنوات ؛ عامل التمدرس كيتعلق ب عدد سنوات التمدرس و هاد التمدرس نيت و العامل الاخير لي هو شروط العيش كتعلق ب مدى توفر المحروقات المستعملة للطهي بحال الغاز و كاين الواد الحار و الماء الصالح للشرب و الكهرباء و المسكن و الاكل.

• البنك الدولي قاليهم بلي الجزائر عندها من افضل و احسن المؤشرات فالمنطقة و بلي مصنفة احسن من المغرب او مصر او العراق، ومع ذلك معجبهومش الحال.

التقرير هضر ايضا على المخاطر لي كتعاني منها الجزائر و لي هي ناتجة عن التغيرات المناخية. التقرير قال بلي الفيضانات هي اكبر المشاكل لي ممكن تعاني منو متبوع بخطر الزلازل. خطر حرائق الغابات كيجي فالمرتبة الخامسة. الجزائر كتخصص سنويا ما يقارب من 255 مليون دولار لواجهة هاد الاخطار، شوفو المبلغ و تذكروا بانه خلال حرائق الغابات الأخيرة الدولة الجزائرية ما كانوش عندها ظائرات لإخماد النيران بحال كانادير لي دايرة من 20 حتى ل 25 مليون دولار.

• بالنسبة لهاد الحرائق فالتقرير يشير بأن المصدر ديالها صعيب يتعرف. 

كانت هادي اصدقائي النقط او اهم النقط لي هضر علبهم تقرير البنك الدولي على الوضعية الاقتصادية الجزائرية. الصحافة الجزائرية عطات اهمية للمسالة ديال الفقر و تجاهلت الامور الاخرى بحال المديونية و خطر التمويل النقدي للاقتصاد و الاحتياطات ديال العملة لي كانت ف 2013 قريبة ل 200 مليار دولار و لي ولات دابا شي 45 مليار دولار. ربما ان اعطاء الاهمية لهاد النقطة ديال الفقر و مهاجمة البنك الدولي كانت نتيجة للحراك لي كتعرفوا الجزائر و لي العسكر مابغاوش يعاود ينوض.